शुक्रवार, फाल्गुण २३ २०८१
काठमाडौं । नेपाल संस्कृत विश्वविद्यालयले आगामी चैत १० गतेका लागि स्ववियु निर्वाचनको तालिका प्रकाशन गरेको छ ।
जसअनुसार यही फागुन २७ गते बिहान १० देखि ४ बजेसम्मका लागि संगठन दर्ताको समय छुट्याइएको छ । फागुन २८ गते बिहान ११ बजे मतदाता सूची प्रकाशन गर्ने र १२ देखि ४ बजेसम्म मतदाता सूचीमा दाबीविरोधका लागि समय तोकिएको छ ।
चैत ३ गते अन्तिम मतदाता नामावली प्रकाशन गर्ने, सोही दिन ४ बजेसम्म उम्मेदवारको प्रत्यक्षतर्फको र समानुपातिकतर्फको मनोनयनपत्र तथा प्रस्तावित नामावली दाखिला गर्ने कार्यतालिका छ ।
चैत ५ गते प्रत्यक्षतर्फको उम्मेदवारको नामावली प्रकाशित गर्ने, सोही दिन उम्मेदवारको नामावलीउपर दाबीविरोध गर्ने समय छुट्याइएको छ ।
चैत ६गते दाबीविरोधउपर छानबिन गरी उम्मेदवारको नामावली प्रकाशित गर्ने, ७ गते दिउँसो १ बजेसम्म उम्मेदवारको नाम फिर्ता लिने अन्तिम समय तोकिएको छ भने सोही दिन ४ बजे उम्मेदवारको अन्तिम नामावली प्रकाशित गर्ने कार्यतालिका छ ।
चैत १० गते बिहान ८ बजेदेखि दिउँसो ४ बजेसम्मका लागि मतदानको समय तोकिएको स्ववियु निर्वाचन केन्द्रीय मूल समितिले जनाएको छ ।
नेपालका दुई पुराना विश्वविद्यालय त्रिभुवन विश्वविद्यालय र नेपाल संस्कृत विश्वविद्यालयमा स्ववियु निर्वाचन हुने गरेको छ । त्रिभुवन विश्वविद्यालयले भने यसअघि नै चैत ५ गतेका लागि निर्वाचनको मिति तोकको छ ।
.png)
