काठमाडौं । World Sqay Martial Art Association ले निरोज कर्माचार्य लाई प्रशासनिक सल्लाहकारका रूपमा नियुक्त गरेको छ। हाल उनी नेपाल स्क्वाय मार्सल आर्ट फेडरेसन का अध्यक्ष हुन्।

एसोसिएसनद्वारा जारी बधाईपत्रमा कर्माचार्यको नियुक्तिप्रति हार्दिक शुभकामना व्यक्त गर्दै उनको नेतृत्व, दूरदर्शिता, समर्पण र इमान्दारिताको उच्च प्रशंसा गरिएको छ। पत्रमा उल्लेख गरिएको छ, “नेपाल स्क्वाय मार्सल आर्ट फेडरेसनको अध्यक्षका रूपमा तपाईंले देखाउनुभएको निरन्तर प्रतिबद्धता र समुदायप्रतिको योगदान प्रेरणादायी रहेको छ।

अन्तर्राष्ट्रिय स्तरमा तपाईंले कमाउनुभएको सम्मान र विश्वास तपाईंको नेतृत्व क्षमताको वास्तविक प्रतिबिम्ब हो।” कर्माचार्य खेलकुद क्षेत्रसँगै सामाजिक तथा व्यावसायिक क्षेत्रमा पनि सक्रिय छन्। उनी Lions Club of Kathmandu Siddhartha Enlight का अध्यक्षसमेत हुन्। साथै, सफल पर्यटन व्यवसायी तथा पर्यटन विज्ञका रूपमा परिचित कर्माचार्य काभ्रे हटलाइन का निवर्तमान प्रधान सम्पादक तथा प्रकाशक र लिडासा पुच भोट का संस्थापक अध्यक्ष पनि हुन्।

एसोसिएसनले विश्वास व्यक्त गरेको छ कि नयाँ जिम्मेवारीमा कर्माचार्यले आफ्नो अनुभव, जोश र बुद्धिमत्तामार्फत संस्थाको मार्गदर्शन, सुदृढीकरण र अन्तर्राष्ट्रिय विस्तारमा महत्त्वपूर्ण भूमिका निर्वाह गर्नेछन्। उनको नियुक्तिलाई व्यक्तिगत उपलब्धि मात्र नभई नेपालमा स्क्वाय मार्सल आर्टको मूल्य, अनुशासन र आदर्शप्रति विश्वास गर्ने सम्पूर्ण समुदायका लागि गर्वको क्षणका रूपमा लिइएको छ।

नवनियुक्त प्रशासनिक सल्लाहकार कर्माचार्यलाई सफल कार्यकालको हार्दिक शुभकामना व्यक्त गरिएको छ।